OS NOSOS CLUBS

CLUB CAMALEÓN

A historia do camaleón

No mes de xullo, un día que o bibliotecario estaba limpando os andeis da biblioteca e colocando os libros da sección infantil, atopou agochado no medio dos libros dun dos caixóns un animal moi raro, nin grande nin pequeno, con ollos saltóns que xiraban en todas as direccións, unha cola moi longa e unha lingua aínda máis longa que o rabo.

Era un camaleón!!
Pero era un camaleón moi raro, era case transparente, non tiña cores.

Cando o bibliotecario lle preguntou quen era, de onde viña, como entrara na biblioteca…, o camaleón quedou pampo, con cara de non saber nin onde estaba e, efectivamente, iso era o que lle pasaba, perdera a memoria e non lembraba nin tan sequera o seu nome.

Desde ese día o camaleón vive na biblioteca, entre os libros, lendo contos e historias a ver se así se lembra de algo. Dálle moita moita vergonza estar case espido, sen cores, e por iso nunca deixa que ninguén o vexa, tan só se achega de vez en cando onda o bibliotecario, cando ten ganas de falar.

Este ano entre todos imos axudarlle ó camaleón a recuperar as súas cores para que así non teña vergonza e se deixe ver e deste xeito poder axudarlle tamén a recuperar a súa memoria e saber quen é, de onde vén, se ten amigos ou familia.

Axúdanos a darlle cor ó noso camaleón. Pincha nas imaxes e descarga o debuxo. Logo,  imprímeo  e coloréao. 
camaleon 1 camaleon 2
Camaleón nº 1 para pintar Camaleón nº 2 para pintar

O noso club:

Inscríbete no Club Camaleón, unha actividade de animación á lectura da que podes formar parte se tés entre 3 e 8 anos de idade e vés acompañado dun adulto. O segundo e o último sábado de cada mes, de 12:00 a 13:00 horas, os nenos e nenas inscritos participarán en diferentes e divertidas actividades como xogos, conta contos, obradoiros, etc. que se celebrarán na BPM de Brión. A actividade é totalmente de balde.



Para saber máis ou inscribirte na actividade, chama ao número de teléfono: 981 50 99 69 (biblioteca)

 CLUB DE LECTURA

En outubro continúa a súa andaina noso club de lectura, unha actividade de dinamización dirixida a maiores de 16 anos con gañas de compartir experiencias lectoras con outras persoas. A nosa idea é reunirnos quincenalmente para realizar unha posta en común de libros que previamente leremos de xeito solidario.

Para inscribirte no club de lectores da biblioteca só é necesario que che guste ler (ou que queiras iniciarte neste enriquecedor hábito) e que lle dediques un pouco do teu tempo de lecer ás xuntanzas periódicas que faremos. Diríxete á biblioteca ou chama ao tfno.: 981 50 99 69 para participar nesta actividade.

Vindeira lectura e xuntanza:

Título: "El orden invisible de las cosas" de Fernando Ontañón

A novela segue os pasos de Juan Devesa en dous momentos decisivos da súa vida: os seus anos na universidade, a mediados dos noventa, cando coñece a Elisa, unha estudante de Zaragoza con quen manterá unha intensa relación amorosa, e o derrubamento, lento e doloroso, do seu matrimonio vinte anos despois. A medida que a súa relación con Elisa se fai máis profunda, unha sombra de inopinada violencia cérnese sobre eles: a noticia da desaparición dun estudante a finais dos anos sesenta ponos na pista da temida Brigada Político-Social do franquismo.
Data da reunión: mércores,  13 de decembro
Hora: 20:00 h.
Lugar: B.P.M. de Brión, Carballeira de Santa Minia nº 2.