LEMBRANZA:
O sábado 1 de abril a biblioteca pública municipal permanecerá pechada. Desculpen as molestias. Grazas.

Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

jueves, 14 de enero de 2016

"O club da calceta" de María Reimóndez, vindeira lectura do club.

Deixamos atrás a costa levantina, escenario das últimas investigacións policiais do brigada Bevilacqua e da sarxento Chamorro, para regresar á Galicia. E facémolo da man de María Reimóndez, escritora lucense e autora da novela “O club da calceta”.

Seis mulleres de idades e procedencias diferentes xúntanse nun local dunha asociación veciñal para aprender calceta. Nos seráns conversan sobre as súas vidas e os seus problemas, que logran superar ben sexa coa axuda das demais ou mediante a toma de conciencia propia.

Unha historia con múltiples facetas, chea de interese social e humano que tamén foi adaptada á escena por Teatro Morcego e ao cine por Antón Dobao. Unha novela que se converte na vindeira lectura do club.

Para comentala e poñer en común a nosa experiencia lectora, reunirémonos o día 3 de febreiro ás 20:30 h. na biblioteca municipal. 

miércoles, 13 de enero de 2016

EBOOKDICORUNA, un novo servizo de préstamo de libro electrónico a túa disposición

Dende a biblioteca pública municipal queremos transmitirvos unha boa nova. A Deputación Provincial da Coruña pon en funcionamento un novo servizo: http://ebook.dicoruna.es/, unha plataforma que pon á disposición dos usuarios de calquera biblioteca municipal da provincia a colección de libros electrónicos da Biblioteca Provincial da Deputación.

A través deste servizo, os usuarios poderán acceder ao préstamo das principais novidades editoriais en formato dixital, e de balde, para a lectura a través de dispositivos electrónicos: teléfonos, tabletas dixitais, lectores de libros electrónicos e computadoras.

Para acceder á plataforma, os usuarios das bibliotecas publicas municipais da provincia farano dende o seu respectivo centro, neste caso dirixíndose á BPM de Brión, dende onde se tramitará a solicitude de alta no servizo.

Que é necesario para facelo?:

1. Ser usuario dalgunha biblioteca municipal ou da Biblioteca da Deputación da Coruña.
2. Ter como mínimo 14 anos de idade. ( Os libros infantís serán descargados por conta dos pais).
3. Ter un dispositivo compatible e unha conta de correo electrónico.

Unha vez realizada a correspondente inscrición, o usuario recibirá un correo electrónico coa información para establecer o contrasinal e acceder a eBookDicoruna. Na plataforma o usuario poderá:

- Procurar no catálogo obras por título, autor ou materia.
- Emprestar ata 2 libros electrónicos por un máximo de 21 días.
- Reservar o documento no caso de que a obra se atope prestada. Pódense reservar 2 libros, confirmando o préstamo antes de 48 horas.
- Devolver a obra. Se non se fai, aos 21 días expírase o arquivo de xeito automático.

Unha vez realizado o préstamo, a obra pode lerse: utilizando a aplicación gratuíta “Adobe Digital Editions” (hai que rexistrarse en Adobe ID, para o que debes descargar o libro desde “A miña conta”); dende a aplicación gratuíta “eBookDicoruna”, dispoñible para sistema Apple e Android. Coa aplicación, os e-books que teñas prestados estarán automaticamente dispoñibles.

Esta é unha nova ferramenta que se suma aos múltiples recursos que che ofrece a túa biblioteca máis próxima , a biblioteca do teu concello. Disporás de acceso a contidos dixitais para a lectura os 365 días ao ano, as 24 horas do día. Ademais, non terás que desprazarte dende a casa, nin para coller nin para devolver o préstamo. Se tes algunha dúbida, contacta coa biblioteca municipal (981 50 99 69) ou directamente coa Biblioteca Provincial da Coruña (981 08 01 76).

Ver tamén, GaliciaLe.gal

martes, 5 de enero de 2016

Lembranza: A biblioteca municipal pecha na tarde do 5 de xaneiro

Con motivo da recepción oficial no pavillón municipal ás SS. MM. Os Reis Magos, a BPM de Brión pechará as súas portas na tarde do día 5 de xaneiro.
A partir do xoves 7 de xaneiro, a biblioteca recuperará o horario de funcionamento habitual:
Mañás: de 10 a 13 h.
Tardes: de 16 a 22 h.
Sábados: de 9 a 14 h.