En agosto e setembro a biblioteca adapta de novo o seu horario á tempada estival. Consultao premendo nesta ligazón.

Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

miércoles, 18 de diciembre de 2013

XVIII Festival de Títeres de Brión

Unha programación clásica do Nadal brionés é o Festival de Títeres, que todos os aninovos divirte a grandes e pequenos a través do humor, a simpatía e a maxia do teatro de monicreques.
Na súa décimo oitava edición o festival trae a Brión no aninovo dúas funcións teatrais que van celebrarse no Centro Social Polivalente de Brión ás 17:00 horas, segundo o seguinte calendario:


Xoves 02/01: TITERES TROMPICALLO “Jiñol”
Rosalía, Jiñol, o Sr. Bulú e o Policia ven alterada a súa vida pola inesperada chegada dun paquete que contén nada máis y nada menos que ... ¡un cocodrilo! ... Este é o comezo dunha historia dinámica e divertida, contada con títeres de luva, na que as distintas situacións da obra xiran entorno ao comportamento que os títeres teñen co intruso.

Venres 03/01: TÍTERES FANTOCHES BAJ “Fábula galénica”
Narrado coma se dun programa de teatro radiofónico se tratase, cóntase como na comarca de Catasós ven reducidos os seus recursos polo desexo do Rei Don Cardo de construírse un castelo novo e desproporcionado. Isto obriga ao Burro Eduardo xunto coa raposa, o lobo e o regato a organizárense na súa loita contra o Rei para recuperar a vida da fraga e a súa contorna.


Unha cita co teatro de monicreques destinada a toda a familia onde pequenos e grandes van gozar con estes divertidos personaxes. Coma de costume a entrada será de balde.

jueves, 12 de diciembre de 2013

Horarios da biblioteca no Nadal

De cara ás Festas de Nadal a biblioteca pública de Brión modifica os horarios de apertura nestas datas tan sinaladas. Os cambios afectan de dúas maneiras, por un lado o centro permanecerá pechado os sábados 14, 21 e 28 de decembro e o 4 de xaneiro. Tamén o 24 e o 31 de decembro.
O resto de días, o horario de apertura será:
Mañás de 10:00 a 13:30 h. e tardes de 16:00 a 20:00 h.
Permanecerá vixente dende o día 23 de decembro ata o 6 de xaneiro.
Moitas grazas e desculpen as molestias.
FELICES FESTAS!!

"A pensión Eva", unha lectura do Club para o Nadal

Despois de gozar con “84, Charing Cross Road” da escritora estadounidense Helene Hanff, iniciamos unha nova lectura no club de cara ás vindeiras festas de Nadal. Nesta ocasión cruzamos o Atlántico, como a correspondencia recollida na mencionada obra, e viaxamos ata o vello continente para facer escala na Italia natal do creador siciliano  Andrea Camilleri. Nado en 1925, este escritor de guións, novelista e director teatral e televisivo, preséntanos “A pensión Eva”, novela coa que abandona temporalmente o seu aclamado personaxe do inspector Montalbano e entrega aos lectores e lectoras unha novela memorable sobre a infancia e a adolescencia na Sicilia da Segunda Guerra Mundial.

Durante os anos da terrible contenda mundial, os cuartos da Pensión Eva, na vila siciliana de Vigata, convértense en refuxio dos seus habitantes. Ademais, esa estraña "pensión" é unha presenza misteriosa para Nené, un rapaz que, ata que logra penetrar na casa, non esperta á vida completamente. A pensión Eva é unha novela de iniciación á vida, á descuberta do sexo, do amor e da amizade nos tempos duros e sen esperanza da guerra.

Tamén é a nosa próxima lectura, da que poñeremos en común opinións o vindeiro mércores 9 de xaneiro de 2014 ás 20:30 h. na biblioteca pública municipal. Ata entón, felices festas e boas lecturas!!

jueves, 28 de noviembre de 2013

84, Charing Cross Road, vindeira lectura do club.

Despois de ler e comentar “As mágoas do mozo Werther” cambiamos completamente de rexistro e pasamos a unha lectura contemporánea: “84 Charing Cross Road” da autora estadounidense Helene Hanff.
Publicado por primeira vez en 1970, a obra narra os 20 anos de correspondencia da escritora con Frank Doel, o principal vendedor de Marks & Co., unha libraría londiniense, do cal ela dependeu para conseguir os escuros clásicos e os títulos da literatura británica. Chegou a estar intimamente relacionada coas vidas do persoal da tenda, enviándolles comida durante a escaseza da posguerra e compartindo con eles os detalles da súa vida en Manhattan.

A autora:

Naceu en Philadelphia, Pensilvania, no ano 1916 e finou en New York en abril de 1997. De formación autodidacta, iniciou a súa carreira literaria escribindo obras de teatro e, máis adiante, guións para a televisión, libros infantís, ensaios históricos e políticos e colaboracións no New Yorker e Harper's. A fama chegoulle despois de publicar “84, Charing Cross Road”, que inspirou unha película protagonizada por Anne Bancroft e Anthony Hopkins.

A obra:

En outubro de 1949, Helene Hanff, unha nova escritora descoñecida, envía unha carta dende Nova York a Marks & Co., a libraría situada no 84 de Charing Cross Road, en Londres. Apaixonada, maniática, extravagante e moitas veces sen un duro, a señorita Hanff reclámalle ao libreiro Frank Doel volumes pouco menos que imposibles de localizar que tranquilizarán a súa insaciable sede de descubrimentos. Vinte anos máis tarde, continúan escribíndose, e a familiaridade converteuse nunha intimidade case amorosa.


Para comentar o líbro, reunirémonos o vindeiro mércores 11 de decembro.
Como de costume, ás 20:30 h. na BPM de Brión. Ata entón, boas lecturas.

jueves, 21 de noviembre de 2013

O importante papel das bibliotecas na sociedade

O Parlamento Europeo na Declaración Escrita 0016/2013 (rexistrada o 7 de outubro de 2013) recoñece os servizos esenciais ofrecidos polas bibliotecas públicas nas comunidades de toda a UE, ofrecendo oportunidades para a aprendizaxe permanente, a inclusión social / dixital e vías para o emprego (baseada nun novo estudo publicado en marzo 2013).

Esta Declaración pon de relevo o facto de que as bibliotecas públicas non só achegan a cultura e os libros, se non que ofrecen beneficios educativos, sociais e económicos a 100 millóns de usuarios das bibliotecas de todos os Estados membros da UE.

Mediante esta Declaración pídese á Comisión “que recoñeza os servizos fundamentais que as bibliotecas públicas ofrecen ás comunidades locais e aos grupos desfavorecidos no referido á inclusión dixital, integración social, á aprendizaxe permanente e íos itinerarios cara ao emprego, así como a función que desenvolven estes servizos contribuindo á consecución dos obxectivos da UE”

Ata o día 7 de xaneiro de 2014, está aberto o prazo para solicitar dos eurodeputados que asinen esta Declaración, e -se contar co apoio do 50% dos deputados- o texto será adoptado polo Parlamento Europeo e remitido á Comisión Europea que debe dar unha resposta á solicitude.

ANABAD-Galicia, como Asociación integrada en FESABID, e esta biblioteca apoia esta campaña e anima a todos os bibliotecarios, usuarios de bibliotecas e público en xeral, a que se dirixan aos deputados españois para solicitarlles o apoio desta importante iniciativa co fin de aproveitar ao máximo esta oportunidade.

Na seguinte ligazón, http://www.wdpubliclibraries.eu/Spain/ pódese encontrar os seguintes documentos:

Declaración Escrita do Parlamento Europeo 9916/2013
Plantilla da carta para enviar aos eurodeputados
Relación de eurodeputados españois e os seus e-mails de contacto

Pódese seguir a campaña nas redes sociais:

Facebook: https://www.facebook.com/WDpubliclibraries
Twitter: https://twitter.com/CivicAgendaEU

Grazas pola vosa colaboración!

Fonte: ANABAD

Ligazón

jueves, 7 de noviembre de 2013

Campaña solidaria con Samuel

A Biblioteca de Brión colabora nunha iniciativa solidaria a prol de Samuel, un neno compostelá de 10 anos que sufre distrofia muscular de Duchene. Por iniciativa de Inés, unha usuaria da biblioteca, dispomos na sala dunha caixa onde depositar tapóns de plástico para reciclaxe que serán destinados a unha causa concreta: a compra dunha grúa e un tratamento de hidroterapia para Samuel.

Se queres participar nesta iniciativa, diríxete a biblioteca ou a Casa de Cultura de Brión para depositar os tapóns desas botellas que desbotas para reciclar. Tamén podes acudir neste mes de novembro á Feira de Brión, os días 9 e 23, das 11 ás 14 h. no Centro Comercial Monte Balado. Alí atoparás un posto moi especial de “Libros solidarios” onde poderás colaborar comprando libros novos e usados para todas as idades. A totalidade do recadado será destinada a Samuel

Máis información en: matibascorner.blogspot.com

Tapóns e envases válidos e non válidos

Club de lectura: "As mágoas do mozo Werther" de Goethe

Despois de ler a "Novela de xadrez" de Stephan Zweig, continuamos con outro autor en lingua alemá, neste caso todo un clásico, Johann Wolfgang von Goethe. Nado en Frankfurt en 1749 e finado en 1832, foi novelista, dramaturgo, poeta, científico, filósofo humanista e, durante dez anos, funcionario do Estado de Weimar.

Se cadra, "Fausto" é a súa obra máis coñecida, máis nesta ocasión imos ler outro dos seus títulos máis significativos: "Die Leiden des jungen Werther" traducido ao galego como "As mágoas do mozo Werther", unha novela epistolar publicada por primeira vez en 1774.

O autor:

Fillo de Johann Caspar Goethe, un avogado que se retirou da vida pública e educou os seus fillos el mesmo, baixo a máxima de non perder o tempo no máis mínimo, e de Katharina Elisabeth Textor, filla dun antigo burgomaestre de Frankfurt. Estes vencellos familiares puxéronlle en contacto desde o principio co patriciado urbano e a vida política.

De altas capacidades e provisto dunha enorme e enfermiza curiosidade, fixo practicamente de todo e chegou a acumular unha omnímoda cultura. Primeiro estudou linguas, aínda que as súas inclinacións ían pola arte e nunca, ao longo de toda a súa vida, deixou de cultivar o debuxo; á vez que escribía os seus primeiros poemas, interesouse por outras ramas do coñecemento como a xeoloxía, a química e a medicina.

Cursou Dereito en Leipzig e Estrasburgo, á vez que escribía os seus primeiros poemas; Katharina von Klettenberg, amiga de súa nai, introduciuno no misticismo relixioso pietista. Trasladado a Estrasburgo, coñeceu alí a Friederike Brion, que lle inspirou a caracterización da maioría das súas personaxes femininas, e trabou amizade co filósofo Johann Gottfried von Herder, cuxos Discursos á nación alemá tanto influíron no Romanticismo alemán.

O propio Goethe narrou a súa vida nun libro autobiográfico, Poesía e verdade, así como na novela parcialmente autobiográfica As mágoas do mozo Werther.

  A obra

As mágoas do mozo Werther foi un dos libros máis lidos e máis influentes do seu tempo. Novela epistolar na que abrollan as paixóns e o mundo interior do ser humano, a obra de Johann Wolfgang von Goethe inclúese no período estético coñecido como Sturm und Drang e leva á literatura unha concepción da escritura que reflicte a expresión máis espontánea, afastada das normas clásicas. Con ela, a narrativa ábrelle as portas á expresión directa dos sentimentos e as emocións.


Werther, un artista novo de temperamento sensible e apaixonado, diríxese de xeito epistolar ao seu amigo Guillermo. Nestas cartas, Werther revela datos íntimos da súa estanza no pobo ficticio de Wahlheim (baseado na cidade de Garbenheim), onde queda encantado polas tradicións simples dos campesiños. Werther foxe da banalidade e a incomprensión da súa cidade natal cando chega a Walheim, nun baile coñece e namórase de Lotte (forma hipocorística de Charlotte), unha fermosa moza que coida os seus irmáns despois da morte da súa nai. Desafortunadamente, Lotte xa está comprometida con Albert, un home once anos maior ca ela. Werther cultiva unha amizade íntima con Charlotte e Albert a pesar da pena que esta relación lle produce, pena que finalmente o leva a abandonar Walheim para dirixirse a Weimar intentando esquecer a Lotte. Alí coñece a Fräulein von B. Werther sofre unha gran pena ao decatarse da voda de Lotte e Albert.

Para comentar a obra reunirémonos o 27 de novembro ás 20:30 h. Como sempre o lugar escollido será a BPM de Brión

Fontes: Wikipedia e outras.

jueves, 24 de octubre de 2013

Día das bibliotecas

O 24 de outubro celébrase o Día da Biblioteca, unha efeméride que busca comunicar á cidadanía as funcións que hoxe en día cumpren as bibliotecas. Uns lugares que queren converterse en puntos de encontro, fonte de recursos para o tempo de lecer e para a procura de información sobre todo tipo de temas, instrumentos para a autoformación e tamén lugares para a convivencia.

As bibliotecas modernas conservan e transmiten toda a información e o coñecemento que atesouran os libros, pero tamén contan cos novos soportes da información da era dixital e ás novas tecnoloxías da información e a comunicación.


Todo isto, e moito máis, atoparás na biblioteca, hoxe e durante todo o ano. Ven cando queiras a coñecernos. BPM de Brión,  o espazo de todos e cada un.

viernes, 18 de octubre de 2013

Club de lectura: "Novela de xadrez" de Stefan Zweig

O Club de lectura reuniuse o pasado mércores para iniciar unha nova andaina con máis lecturas para por en común. Nesta ocasión a obra escollida é “Novela de xadrez” (Die Schachnovelle, 1941) derradeira novela do escritor austríaco Stefan Zweig escrita pouco antes do seu suicidio, acontecido o 22 de febreiro de 1942. Foi publicada de forma póstuma en 1944.

O relato é unha crítica clara contra o nazismo e os métodos da Gestapo, a incomunicación e o exilio forzado, experimentado por Zweig, quen xamais regresaría á súa Austria natal. "Novela de xadrez" está considerada a súa obra mestra.

O autor:
Stefan Zweig (Viena, 1881 - Petrópolis, Brasil, 1942) foi un escritor enormemente popular, tanto na súa faceta de ensaísta e biógrafo coma na de novelista. A súa capacidade narrativa, a pericia e a delicadeza na descrición dos sentimentos e a elegancia do seu estilo convérteno nun narrador fascinante, capaz de seducirnos dende as primeiras liñas.
Fillo dun poderoso industrial, recibiu unha esmerada educación. Durante os seus anos de xuventude percorreu Europa, traballando como tradutor e colaborando en distintas publicacións. Cando estalou a Primeira Guerra Mundial, manifestou a súa posición pacifista. Ante a implantación cada vez maior das forzas nazis en Austria, emigrou a Londres. Da súa produción literaria destacan 'Cordas de prata', un exemplar onde reúne a súa poesía, e novelas como 'Jeremías', 'Amok', 'O xogador de xadrez' ou 'A confusión dos sentimentos'. Tamén escribiu as biografías dalgúns dos personaxes máis grandes da literatura como Dickens ou Balzac.

Sinopse:

Mirko Czentovi é un home rudo e ignorante, ademais de ser o campión mundial indiscutible de xadrez. Durante unha viaxe en barco, algúns afeccionados do xadrez enfróntanse a el nalgunhas partidas amigables que, por suposto, o campión gaña sen o menor esforzo.
Pero nunha partida co enigmático Dr. B., cos consellos dos pasaxeiros que Czentovi non pode soportar, arranca un empate. Czentovi, asombrado pide a desquite ao día seguinte…

jueves, 10 de octubre de 2013

O camaléon regresa á biblioteca tras as vacacións (editado)

Xa podes inscribirte no Club Camaleón, unha actividade de animación á lectura para nenos e nenas de entre 3 e 8 anos de idade acompañados dun adulto. Como novidade, ademais de ampliar a idade de participación, este curso teremos dous días ao mes de actividades: o segundo e cuarto venres de cada mes. A taxa a aboar pola inscrición será de 20 € por trimestre.

Se estás interesado/a xa podes inscribirte ata fin de mes na Casa da Cultura ou na biblioteca municipal. Tamén podes chamar ao 981 509908 (Casa da Cultura) ou ao 981 509969 (biblioteca)

Conmeza unha nova andaina do Club de lectura

O vindeiro mércores 16 de outubro o Club de lectura da BPM de Brión reúnese para comezar unha nova andaina. A xuntanza será ás 20:30 h. na biblioteca, e nela escolleremos a próxima lectura. A nosa idea é reunirnos cada tres semanas para realizar unha posta en común de libros que previamente leremos de xeito solidario.

Se estás interesado/a en inscribirte no club de lectores da biblioteca só é necesario ter mínimo 16 anos, que che guste ler (ou que queiras iniciarte neste enriquecedor hábito) e que lle dediques un pouco do teu tempo de lecer ás xuntanzas periódicas que faremos. Diríxete á biblioteca ou chama ao tfno.: 981 50 99 69 para participar nesta actividade.


martes, 24 de septiembre de 2013

A biblioteca pecha os días 26, 27 e 28 de setembro

Con motivo da Romaría de Santa Minia, que vai celebrarse os días 26, 27 e 28 de setembro, a BPM de Brión permanecerá pechada. Tamén lembrar que, a partir do luns 30 de setembro, voltaremos a abrir en horario de mañá de luns a venres.

Dende a biblioteca pedímoslles desculpas polas molestias ocasionadas e desexámoslle que gocen da Romaría de Santa Minia e da programación de actividades que está prevista neste días.

lunes, 29 de julio de 2013

Aviso importante: Modificación no horario de apertura na segunda quincena de setembro

Do 16 de setembro ao día 25 a biblioteca municipal permanecerá pechada en horario de mañá por motivos técnicos. Non obstante, si abrirá na mañá do sábado 21 de setembro. Polas tardes o horario será o habitual, de 16:00 a 22:00 h. O sábado 21 de setembro abriremos de 9:00 a 14:00 h.

Tamén informamos que con motivo da Romaría de Santa Minia a BPM de Brión permanecerá pechada os días 26, 27 e 28 de setembro.

A partir do día 30 voltaremos a normalidade cos horarios habituais.

Desculpen as molestias ocasionadas.

jueves, 27 de junio de 2013

Encontro coa Arte: Lembrando a Roberto Vidal Bolaño

Os días 28, 29 e 30 de xuño celébrase o VIII Encontro coa Arte que este ano homenaxea a figura do ilustre dramaturgo Roberto Vidal Bolaño. Unhas xornadas que van reunir durante unha fin de semana preto dunha trintena de artistas que participarán en diferentes actividades e realizarán varios obradoiros de pintura do natural en varios lugares do concello.

O Encontro coa Arte deste ano iníciase o venres 28 de xuño a mediodía, coa recepción dos participantes nun acto, presidido polo alcalde José Luís García García, que vai celebrarse no Salón de Plenos Municipal. Dende as 16:15 horas os artistas pintarán na entorna natural da Igrexa parroquial de Sta. María de Luaña. Unha ocasión única para contemplar aos pintores e participar do proceso creativo que desemboca na creación dunha obra de arte.

Pero o principal acto do día vai ser por partida dobre: por un lado a homenaxe a Roberto Vidal Bolaño, protagonista indiscutible deste ano no que o Día das Letras Galegas nos achegou a vida e a obra deste xenial autor; por outro a inauguración da exposición das obras doadas no VII Encontro coa Arte “Lembrando a Castelao”. Ámbolos dous terán lugar na Sala de Exposicións da Casa da Cultura de Brión a partir das 21:00 h.

Por este motivo, a BPM de Brión pechará as súas portas ás 20:00 h. en lugar de as 22:00 h. Pedimos desculpas polas molestias ocasionadas e convidamos a todos os usuarios da biblioteca a acudir ao mencionado acto.

A partir de xullo, novo horario de verán

No mes de xullo a biblioteca municipal de Brión adapta as horas de apertura á tempada estival.
Dende o luns día 1 e ata o mércores 31, a biblioteca prestará os seus servizos no seguinte horario:

Luns a venres
Mañás: de 10:00 a 13:30 horas.
Tardes: de 16:00 a 20:00 horas.
Non abrimos na mañá dos sábados

jueves, 13 de junio de 2013

"O curioso incidente do can á media noite" nova lectura do club

o curioso incidente do can a medianoite
Da obra de Julio Cortázar pasamos a un menos coñecido autor británico, Mark Haddon, escritor, ilustrador, pintor e profesor na súa Inglaterra natal.

A obra

A novela gañou en 2003 o premio "Libro do Ano Withbread", en 2005 o premio ao "Mejor primeiro libro para novos lectores" e en 2004 o " Premio para Escritores da Commonwealth" como mellor primeiro libro. O título da novela é unha cita a un comentario feito polo detective de ficción Sherlock Holmes no conto "Silver Blaze" de Sir Arthur Conan Doyle.
Christopher é un rapaz con síndrome de Asperger que vive co seu pai en Swindon. Unha noite descobre o cadáver de Wellington, o caniche da súa veciña, atravesado por unha forcada de xardín. A señora Shears, dona do can, chama a policía, que comeza a interrogar o rapaz. Christopher empeza a sentirse axitado por tantas preguntas, e un dos oficiais intenta agarralo dun brazo, o que provoca que o rapaz o golpee e que se o levan a comisaria ata que o seu pai o recolle. Christopher decide entón investigar o caso para limpar o seu nome. Non obstante, a súa investigación vese gravemente limitada polos seus temores e dificultades á hora de interpretar o mundo que o rodea. Durante a súa investigación, Christopher verase forzado a entrar en contacto con xente con quen nunca se relacionou, a pesar de que viven na súa mesma rúa.

 

O autor

Haddon é escritor, ilustrador, pintor e profesor. Escribiu numerosos libros para nenos e un poemario. Traballou durante un tempo con persoas con deficiencias físicas e mentais, o que o axudou a crear a súa primeira novela "O curioso incidente do can a media noite" (2004), gañadora do premio Whitbread e a Commonwealth. Antes de escribir este libro, xa escribira contos para nenos e tamén os ilustrara. Tamén participaba na creación de guións para series e películas de TV. Actualmente dá clases de literatura creativa na Universidade de Oxford e na fundación Arvon, e dedícase á pintura abstracta


A reunión terémola o 10 de xullo ás 20:30 h. na BPM de Brión. Con esta xuntanza poremos punto e seguido á actividade do club, para reiniciala á volta do verán.

viernes, 24 de mayo de 2013

"Roberto Vidal Bolaño, sempre aquí"

Un grupo de teatro formado por alumnos do IES de Brión baixo a dirección de Lucho Penabade e Tero Rodríguez van representar a obra "Roberto Vidal Bolaño, sempre aquí"

A compañía está conformada por Alex,  Camila,  Carmela,  Irene, Leda, Lola, Lucas, Manuel, Mari Carme, Martiño, Patricia, Rosalía  e Simón, un elenco de novos actores que puxeron moita ilusión e esforzo neste proxecto.

Todos eles contan co apoio da asociación de pais e nais de alumnos/as "Pedra Viada" ANPA do IES de Brión-Pedrouzos, do propio centro de Secundaria e do Concello de Brión.

O espectáculo terá lugar o vindeiro sábado 1 de xuño ás 21:00 h. no Centro Social Polivalente. A entrada é libre.

miércoles, 22 de mayo de 2013

Club de lectura: "Historias de cronopios y de famas" de Julio Cortázar

De ratones y hombres
Despois "De ratos e homes" (Of Mice and Men, 1937). de John Steinbeck  imos ler "Historias de cronopios y de famas" de Julio de Cortazar.

A obra

"Historias de cronopios y de famas" (1962) é un dos libros lendarios de Julio Cortázar. Postulación dunha mirada poética capaz de enfrontar as miserias da rutina e do sentido común, Cortázar toma aquí partido pola imaxinación creadora e o humor corrosivo dos surrealistas.
Esta colección de contos e viñetas entrañables é unha introdución privilexiada ao mundo inesgotable dun dos máis grandes escritores deste século e un antídoto seguro contra a solemnidade e o aburrimento.
Sen dúbida ningunha, con este libro Cortázar sela un pacto de complicidade definitiva e incondicional cos seus lectores.

 Fonte: Alfaguara

 

O autor

Julio Cortázar naceu en Bruxelas o 26 de Agosto de 1914, de pais arxentinos. Chegou á Arxentina aos catro anos. Paso a infancia en Bánfield, graduouse como mestre de escola e iniciou estudos na Universidade de Buenos Aires, os que debeu abandonar por razóns económicas. Traballou en varias vilas do interior do país. Ensinou na Universidade de Cuyo e renunciou ao seu cargo por desavinzas co peronismo. En 1951 afastouse da Arxentina e dende entón traballou como tradutor independente da Unesco, en París, viaxando constantemente dentro e fóra de Europa. En 1938 publicou, co pseudónimo Julio Denis, o libriño de sonetos ("muy mallarmeanos", dixo despois el mesmo) "Presencia". En 1949 aparece a súa obra dramática "Los reyes". Apenas dous anos despois, en 1951, publica "Bestiario": xa xorde o Cortázar cegador pola súa fantasía e a súa revelación de mundos novos que irán enriquecéndose na súa obra futura: os inesquecibles tomos de relatos, os libros que desbordan toda categoría xenérica (poemas-contos-ensaios á vez), as grandes novelas: "Los premios" (1960), "Rayuela" (1963), "62/Modelo para armar" (1968), "Libro de Manuel"(1973). O refinamento literario de Julio Cortázar, as súas lecturas case inabarcables, o seu incesante fervor pola causa social, fan del unha figura de cegadora riqueza, constituída por paixóns ás veces encontradas, pero sempre asumidas con el mesmo, xenuíno ardor. Julio Cortazar morreu en 1984 pero o seu paso polo mundo seguirá suscitando o fervor dos que coñeceron a súa vida e a súa obra.



sábado, 18 de mayo de 2013

Roberto Vidal Bolaño, sempre en Brión

Roberto Vidal Bolaño está nestas datas moi presente pola homenaxe que recibe no Día das Letras Galegas. Unha conmemoración que Brión vive dun xeito especial por tratarse Roberto dun persoeiro intimamente ligado co concello. Porque non debemos esquecer que Roberto viviu os seus derradeiros anos entre nós. Aínda que nado en Santiago, o autor de “Criaturas” e “Animaliños” elixiu Brión, como lugar de residencia. Por iso non é de estrañar que o seu recordo permaneza moi vivo na lembranza dos brioneses.

Porque Vidal Bolaño sempre estará aquí, en Brión na memoria colectiva do todos. Dos que o coñeceron persoalmente e dos que o descobren por primeira vez. O legado máis valioso que nos deixou é a súa obra literaria e unha importante achega á dramaturxia galega contemporánea na que exerceu case todos os oficios. Porque no teatro galego hai un antes e un despois de Vidal Bolaño, e grazas a el tamén haberá un brillante futuro. A súa herdanza sirve de inspiración e guía a autores, directores e actores que continúan na senda dun home polifacético que o dou todo polo seu oficio.
Roberto e Belén co equipo de "Teatro do Aquí" nas antigas instalacións da BPM de Brión
Brión realiza a súa particular homenaxe a Roberto a través dunha programación especial da Feira do Libro-Letras Galegas 2013. Uns actos que se prolongarán de maio a novembro no Ano Roberto Vidal Bolaño. Dentro do apartado teatral destacamos dúas actuacións que terán lugar neste mes de maio. Dúas representación únicas que terán lugar o sábado 18, coa compañía ‘Teatro do Aquí’, e o día 25, con ‘Teatro Antroido’.

O día 18 de maio “Criaturas”, de 'Teatro do Aquí' achéganos a montaxe orixinal de Roberto Vidal Bolaño a través da dirección de Evaristo Calvo. Despois da súa representación en Oleiros (26 e 27 de abril), Muros (3 e 4 de maio), Vilagarcía (10 de maio) e Santiago de Compostela (do 15 ao 17 de maio) o emblemático texto do xenial dramaturgo represéntase en Brión no Centro Social Polivalente ás 20:30 h., con entrada libre.
 
O sábado 25 de maio 'Teatro Antroido' presenta en Brión “BailadELAS: mulleres boloñesas” de Roi Vidal sobre textos Roberto Vidal Bolaño. 'BailadELAS' está dirixida por Roi Vidal Ponte e Xavier Estévez e interpretada pola actriz Laura Ponte, impulsora xunto con Roberto Vidal Bolaño da compañía Teatro Antroido, revivida para esta produción onde a persoa e as personaxes de Roberto Vidal Bolaño, protagonizan unha obra única para un ano único. A representación será de novo no Centro Social Polivalente ás 20:30 h. con entrada de balde.

Dous espectáculos, dúas oportunidades únicas para coñecer a obra do dramaturgo, actor e director que marcou un antes e un despois no teatro galego de onte, hoxe e sempre.

viernes, 3 de mayo de 2013

Club de lectura: 'De ratos e homes' de John Steinbeck

De ratones y hombres
Tras ler  "La sonrisa etrusca" de José Luis Sampedro, a vindeira lectura  é  "De ratos e homes" (Of Mice and Men, 1937). O  autor John Steinbeck  (California 1902-New York, 1968) é un dos escritores americanos de maior sona no S. XX, Premio Nobel de Literatura en  1962.

A obra

A historia sitúase nunha granxa preto de Soledad no Val de Salinas durante a Gran Depresión (1929-1939). A novela relata a tráxica historia de George Milton e Lennie Small, dous traballadores agrícolas itinerantes que soñan con ter algún día unha pequena granxa. George, pequeno e intelixente, fai de figura paterna de Lennie, que é grande, forte e inxenuo. A Lennie, que é candorosamente estúpido cústalle aprender as cousas e encántalle todo o que é brando, pero a súa inmensa forza física é unha fonte de problemas e George, o único amigo de Lennie, ten que calmalo. A obra foi traducida a numerosas linguas e adaptada  ao teatro, o cine e a TV.

O autor

John Steinbeck é un narrador e dramaturgo estadounidense, famoso polas súas novelas que o sitúan na primeira liña da corrente naturalista ou do realismo social americano, xunto a nomes como E. Caldwell e outros. Estudou na Universidade de Stanford, pero dende moi temperán tivo que traballar duramente como albanel, xornaleiro rural, agrimensor ou empregado de tenda. Na década de 1930 describiu a pobreza que acompañou á Depresión económica e tivo o seu primeiro recoñecemento crítico coa novela “Tortilla Flat”, en 1935.
O seu estilo, herdeiro do naturalismo e próximo ao periodismo, susténtase non obstante nunha gran carga de emotividade nos argumentos e no simbolismo que trasuntan as situacións e personaxes que crea, como acontece nas súas obras maiores: Of Mice and Men (“De ratos e homes”) (1937), The Grapes of Erath (“As uvas da ira”) (1939) e East of Eden ("Ao leste do Edén") (1952).



Fontes: wikipedia : http://www.biografiasyvidas.com

Programación especial Letras Galegas-Ano Vidal Bolaño

O ano no que o Día das Letras Galegas lembra ao dramaturgo Roberto Vidal Bolaño, ilustre veciño de Brión, o concello presenta unha programación especial anual que se estenderá dende maio ata novembro, cunha oferta de actividades centrada no teatro e na escena, como non podía ser doutro xeito.

Feira do Libro de Brión

A Feira do Libro de Brión vai celebrarse do 13 ao 31 de maio. Como en edicións anteriores centra a súa atención nos máis novos ofertando numerosos espectáculos e propostas de dinamización para os nenos e mozos dos centros educativos brioneses.
Destinadas ao público en xeral destacan as representacións teatrais de “Criaturas” e “BailadELAS” a cargo respectivamente das compañías “Teatro do Aquí” e Teatro Antroido. Tamén relacionado coa escena están os “Monólogos na Carballeira: venres de conto e comedia”, un interesante ciclo que achega a Brión a humoristas galegos como Pepe Capelán, Óscar Maldados , Pedro Brandariz, Boquete e Víctor Grande. Os espectáculos terán lugar dende o 31 de maio ao 5 de xullo na Sala de Exposicións de Brión ás 20:30 h.

En xuño, "Encontros coa Arte"

En xuño regresan os “Encontros coa Arte” que este ano homenaxean a Roberto Vidal Bolaño. Mencionar que as coñecidas xornadas atrasan as súa data de celebración ata os días 28, 29 e 30 de xuño. O día 1 dese mes o Centro Social Polivalente acolle ás 8 do serán a presentación da montaxe do Grupo de Teatro do IES de Brión. Un espectáculo que nin os pais nin o resto de veciños podemos deixar de ver.

Outono teatral

 En outubro e novembro regresará aos escenarios de Brión o teatro de Roberto Vidal Bolaño así como unhas xornadas sobre o dramaturgo organizadas pola ANPA Pedra Viada.

Para coñecer un adianto da programación especial Día das Letras Galegas-Ano Roberto Vidal Bolaño que se desenvolverá no Concello de Brión dende maio ata novembro de 2013 so temos que visitar o portal institucional do concello ou premer na seguinte ligazón.

jueves, 25 de abril de 2013

Reunión de abril do Club Camaleón

Pois si, chega fin de mes e con el unha nova xuntanza do Club Camaleón.Unha reunión que coma de costume presenta dúas quendas: unha ás 17:00 h. e outra ás 19:00 h.
Máis xogos e actividades pensadas para pasar un entretido serán na biblioteca. Un bo momento para coller uns cantos libros para ler a fin de semana.
Non te esquezas, o venres 26 de abril a partires das 17 h. o camaléon da biblioteca espera por ti.

lunes, 22 de abril de 2013

23 de abril, Día do Libro

O 23 de abril, celébrase o  "Día do libro e dos dereitos de autor", unha efeméride creada pola Unesco en 1995 coa intención de homenaxear o libro "animando a todo o mundo, sobre todo ás persoas máis novas, a descubrir o pracer da lectura e a respectar a insubstituíble achega dos autores ao progreso social e cultural".

Coincidindo coa data do falecemento en 1616 de Cervantes, Shakespeare e coa festa de Sant Jordi en Cataluña, o 23 de abril é a grande festa do libro, das librarías e bibliotecas, da promoción da lectura, da tradución e do respecto á propiedade intelectual. Unha celebración que nesta edición centrarase na promoción da frase "Ler para vivir" (#lerparavivir) nas redes sociais.

Se ven a BPM de Brión concentra as actividades de promoción do libro e a lectura na Feira do Libro de Brión que, coincidindo co día das Letras Galegas, celébrase do 13 ao 31 de maio, queremos animarvos a aproveitar o día coñecendo os servizos que che ofrece a biblioteca. Os clubs de lectura (infantil e para adultos), as actividades bookcrossing (Solta de Libros e Banco de Libros) e toda a programación de actividades da Feira do Libro, coas que este ano se vai homenaxear a figura do dramaturgo Roberto Vidal Bolaño. 

No referente ao intercambio de libros, adiantarvos que en maio imos actualizar e aumentar os puntos “Solta de libros”. Tamén che invitamos a unirte ao “Banco de libros” e compartir con outros usuarios as lecturas que recomendarías a todo o mundo.

jueves, 11 de abril de 2013

'La sonrisa etrusca' de José Luis Sampedro, próxima lectura do club

De cada reunión do club nace a proposta dunha nova lectura. Despois de xuntarnos o mércores para comentar a novela “Todo é silencio” de Manuel Rivas, decidimos escoller como vindeiro libro unha obra do recentemente finado José Luis Sampedro. Unha lectura que quere ser unha homenaxe e un achegamento a obra deste autor.

Nado en Barcelona no 1917, José Luís foi escritor e economista, catedrático de Estrutura Económica pola Universidade Complutense de Madrid dende 1955 ata 1969, compaxinándoo con diversos postos no Banco Exterior de España alcanzando o nivel de Subdirector Xeral. Tamén foi profesor visitante nas universidades de Salford e Liverpool e cofundador do Centro de Estudos e Investigacións (CEISA). Impartiu cursos na Escola Diplomática, o Instituto de Estudos Fiscais e na Universidade Autónoma de Barcelona. En 1977 é nomeado senador por designación real, nas primeiras Cortes democráticas, posto que ocupará ata 1979. En paralelo á súa actividade profesional como economista, publica diversas novelas e tras a súa xubilación continúa dedicado a escribir, conseguindo grandes éxitos con obras como "Octubre, octubre" ou a coñecida novela "La sonrisa etrusca". En 1990 é nomeado membro da Real Academia Española onde pronunciou o seu heterodoxo discurso de ingreso, "Desde la frontera". Brillantemente lúcido, xa case centenario, exerceu o seu humanismo crítico acerca da decadencia moral e social de Occidente, do neoliberalismo e as brutalidades do capitalismo salvaxe.


La sonrisa etrusca

Un vello campesiño calabrés chega á casa dos seus fillos en Milán para someterse a unha revisión médica. Alí descobre o seu último afecto, unha criatura na que envorcar toda a súa tenrura: o seu neto, que se chama Bruno, como a el o chaman os seus camaradas partisanos. E vive tamén a súa última paixón: o amor dunha muller que iluminará a etapa final da súa vida concedéndolle toda a súa plenitude...

Unha fermosa novela, publicada en 1985, sobre o eterno problema do amor, coa verdade que ofrece un coñecemento profundo da alma humana.

Reunirémonos para comentala o xoves 2 de maio ás 20:30 horas na BPM de Brión
Boa lectura!

sábado, 6 de abril de 2013

Preséntase en Brión 'El fugitivo' BD baseada na novela de Ramón J. Sender

Hans Leuenberger e Jaime Asensi presentaron en Brión o cómic “El fugitivo”, adaptación da novela homónima do autor aragonés Ramón J. Sender. O acto celebrouse o venres 5 de abril ás 20:30 horas na Sala de Exposicións do Concello de Brión, un espazo polivalente que ocupa a planta baixa da Casa da Cultura.

Aínda que oriúndo de Suíza, Hans Leuenberger reside en Ronda (Málaga) onde exerce a súa profesión de xornalista e tradutor. En Zurich comezou os seus estudos de comunicación e publicidade. En Suíza e Alemaña traballo en prensa e radio. Dende os anos 80 vive en España onde cultiva as artes, a fotografía, o vídeo experimental e o xornalismo. Tamén se dedica á tradución e a interpretación xurídica e comercial en castelán, francés, inglés e alemán.

O arousán Jaime Asensi reside na actualidade no veciño Concello de Ames. Debuxante e deseñador gráfico, comezou a súa andaina profesional nos anos 80, destacando como ilustrador de numerosos libros e cómics. Actualmente traballa como deseñador e ilustrador “freelance” para a Xunta de Galicia, editoriais e axencias de publicidade. En banda deseñada destacan a súas adaptacións de “Fragmentos de Apocalipsis” de Gonzalo Torrente Ballester, con guión de César Lombera ou “Pic-Nic” de Fernando Arrabal, obra este última que presentou en Brión hai dous anos.

“El fugitivo”, editado polo selo LeoEdita, adapta a novela homónima de Ramón J. Sender publicada en 1972. O relato narra a historia dun home acusado, perseguido e condenado a morte por uns incertos ideais nunha contenda bélica que podería ser a Guerra Civil. Na súa fuxida acaba refuxiándose nunha igrexa onde pretende fuxir do seu destino. Asumindo a condena como un feito inevitable busca a morte de xeito consciente pero cae no paradoxo de que a pena capital á que estaba sentenciado non pode cumprirse pois mentres isto acontece tolea.


A obra está ambientada en Aragón, de onde era orixinario Ramón J. Sender, concretamente na comarca do “Bajo Cinca”, en localizacións que Hans recorreu e fotografou para crear un guión que nun primeiro momento estaba pensado para converterse nunha curtametraxe ou nunha obra teatral. Logo, apareceu Jaime e o proxecto converteuse no cómic que foi presentado na sala de exposicións de Brión. Unha interesante achega a banda deseñada que xa pode atoparse en librarías como Mainomen, establecemento amiense que colaborou na organización da presentación.

lunes, 1 de abril de 2013

Presentación en Brión do cómic 'El fugitivo'

O venres 5 de abril o ilustrador Jaime Asensi e o guionista Hans Leunberger presentan en Brión “El Fugitivo”, un cómic que adapta a novena homónima do escritor Ramón J. Sénder.

O acto, ao que está convidada toda a cidadanía, comezará ás 20:30 h. na Sala de Exposicións do Concello de Brión, espazo situado na planta baixa do edificio que alberga a Casa da Cultura. A el acudirán os autores da banda deseñada, publicada pola editorial malagueña LeoEdita.

O cómic, baseado nun texto do xenial autor oscense, está ambientado nos anos posteriores á Guerra Civil e narra a historia dun cidadán acusado, perseguido e condenado a morte e céntrase no seu particular peripecia, que lle leva nun primeiro lugar a fuxir da condena e daqueles que deben axustizalo e a buscar en último termo a morte de xeito consciente.

viernes, 22 de marzo de 2013

Nova reunión do Club Camaleón

Os piratas chegaron esta tarde a biblioteca de Brión da man do Club Camaleón. Mellor dito a pirata, porque arribou unha simpática bucaneiro de auga doce e salgada, acompañada pola súa inseparable mascota, que nesta ocasión non era un papagaio, senón un intrépido polbo aventureiro.

Con ela chegaron as historias de aventuras e unha arca do tesouro. Tamén as pinturas e os pinceis, ferramentas coas que materializar os soños sobre o cartón con vivas cores que nada teñen que envexar as do noso camaleón.
Divididos en dous grupos, que participaron en quendas consecutivas, os nenos e nenas integrantes do club volveron a xuntarse para xogar e gozar coas historias dos libros que custodia fielmente o camaleón que habita na biblioteca.

Os pequenos, de idades comprendidas entre os tres e os seis anos, pasárono en grande acompañados polos seus familiares e as monitoras que supervisan a actividade, organizada de xeito conxunto pola biblioteca e o Departamento de Mocidade e Voluntariado de Brión.

 
Aproximadamente dentro dun mes haberá unha nova xuntanza do Club Camaleón, con máis propostas lúdicas e educativas onde a animación á lectura se combina con diversión e entretemento. Un club no que hai inscritos 28 participantes e que sigue aberto a quen queira incorporarse. Queres ser ti o seguinte? 

jueves, 21 de marzo de 2013

"Todo é silencio" de Manuel Rivas, vindeira lectura do club

Tras “Crime en Compostela” de Carlos G. Reigosa continuamos a nosa senda lectora da man dun dos autores máis recoñecidos do actual panorama literario galego e nacional: o coruñés Manuel Rivas. Xornalista de profesión, ten publicado numerosos libros de poemas, novelas, artigos e ensaios literarios. Está considerado pola crítica como un revolucionario da literatura galega contemporánea sendo el un personaxe comprometido coa súa terra e coa súa cultura.

Todo é silencio, unha novela sobre o contrabando

“Todo é silencio” foi publicada por Edicións Xerais en outubro de 2010 e acadou o premio de narrativa da AELG (Asociación de Escritores en Lingua Galega) en 2011. Tamén nese ano comezou a rodaxe da adaptación cinematográfica da obra, con guión de Gerardo Herrero, dirixida por José Luis Cuerda e coa participación de Quim Gutiérrez, Ángel Silvestre e Celia Freijeiro.

Argumento:

En Noitiá, na costa atlántica, houbo un tempo en que as redes do contrabando, reconvertidas ao narcotráfico, alcanzaron tanta influencia que estiveron moi preto de controlalo todo: o poder social, as institucións, a vida das súas xentes.

Fins, Leda e Brinco exploran a costa á busca do que o mar bota tras algún naufraxio, o mar é para eles un espazo de continuo descubrimento. O destino destes mozos estará marcado pola sombra odiosa e fascinante a un tempo do omnipresente Mariscal, dono de case todo en Noitiá.

A narración segue a liña das anteriores novelas do autor. Está escrita en terceira persoa cun narrador omnisciente, e inclúe abondosas descricións. Parte da historia está baseada en feitos e personaxes reais, relacionados cos clans do contrabando e narcotráfico existentes no Salnés e o Barbanza, relacionados á súa vez con clans estranxeiros. Así mesmo, teñen bos contactos coa igrexa e coa xustiza.

A trama comeza a mediados da década de. A segunda parte comeza uns 20 anos despois, a mediados da década de 1980. Co paso do tempo vanse vendo as melloras tecnolóxicas usadas polos clans para comunicarse e para transportar a droga.

Para comentar esta obra reunirémonos o vindeiro 10 de abril ás 20:30 h.

lunes, 18 de marzo de 2013

Este venres, ven xogar co camaleón

Atención, camaleóns! O venres 22 de marzo, se pertences ao Club, estás convidado a asistir a unha nova sesión desta actividade de animación á lectura destinada a nenos e nenas de 3 a 5 anos de idade.
Como sempre, vai celebrarse en dúas quendas: a primeira das 17 ás 18 h. e a segunda das 18 ás 19 h. Non te esquezas de escoller a hora que máis che conveña.
Nesta ocasión, e con motivo das vacacións de Pascua, a actividade adiantase unha semana na data de celebración habitual, que sempre é o derradeiro venres de cada mes.

lunes, 4 de marzo de 2013

'Crime en Compostela', a vindeira lectura do club

Do humor e de crítica social do finés Arto Paasilinna pasamos a unha novela negra feita e ambientada en Galicia. Un clásico do xénero de intriga escrito por Carlos G. Reigosa na décasa dos oitenta: "Crime en Compostela", unha obra publicada en 1984 e que conseguiu o 1º Premio Xerais de Novela.

Nivardo Castro, que se autodefine como "aventureiro", investiga un asasinato acontecido en Santiago de Compostela, xunto ó seu amigo o xornalista Carlos Conde. Os dous compañeiros, que se coñeceran no seminario de Mondoñedo, redescobren a cidade: os seus persoeiros, os pubs e os monumentos. Está ambientado a principios dos anos 80, polo que ademais dos habituais personaxes alcólicos, típicos dos suburbios e clubs de alterne, ten presenza a xeración castigada polo abuso da heroína.

O autor do libro é licenciado en Ciencias da información e Ciencias políticas. Comezou a súa carreira xornalística en La Voz de Galicia. Redactor da axencia EFE desde 1974, foi o seu director de información (1990-1997) e director de publicacións (1997-2004). É autor de multitude de artigos de crítica literaria e teatral e de política internacional, publicados en xornais e revistas tanto españois como americanos. É profesor no Máster de Relacións Internacionais da Universidade Complutense de Madrid e no Máster de Xornalismo de Axencias da Universidade Rey Juan Carlos e a Axencia EFE

A reunión para comentar a obra vai ser o mércores 20 de marzo na BPM de Brión ás 20:00 horas.

miércoles, 27 de febrero de 2013

Reunión do club de lectura

O mércores 27 de febreiro ás 20:00 h. o club de lectura da biblioteca pública municipal reúnese para intercambiar experiencias lectoras sobre "O bosque dos raposos aforcados", a novela do escritor finés Arto Paasilinna que veñen de ler. Ademais de falar desta obra, aproveitarase a ocasión para escoller a vindeira lectura e fixar a data da seguinte reunión.

jueves, 21 de febrero de 2013

24 de febreiro, Día de Rosalía

O 24 de febreiro conmemórase o Día de Rosalía (176 aniversario do seu nacemento) unha efeméride que vai ser celebrada ao longo de Galicia con diferentes actos. A continuación presentamos os que se van celebrar en Santiago (lugar de nacemento) e Padrón.

10:00-12:00 horas.
Alborada para Rosalía
. Todos os gaiteiros de Galicia están chamados a dar unha alborada de gloria. Iniciativa conxunta da Fundación Rosalía de Castro coa Asociación de Gaiteiros Galego

10:00 horas
Santiago de Compostela \\ Praza de Vigo.
Alborada e ofrenda oral
ao pé do monumento que lembra onde naceu a escritora.

12:00 horas
Padrón \\ Casa de Rosalía

Interpretación da Alborada de Rosalía de Castro.
Personalidades culturais, sociais e políticas de toda Galicia interveñen e recitan na honra da escritora.
Proxección de diferentes gravacións das alboradas realizadas ese mesmo día en distintos lugares de todo o país.
Presentación dos actos conmemorativos do 150 aniversario de Cantares gallegos.
Actuación musical de Uxía e Sérgio Tannus.

Durante o ano haberá diferentes actividades ao longo de todo o país, como unha exposición, concertos, etc. Tamén moitas outras institucións, como a AELG ou o Consello da Cultura Galega, ademais de múltiples asociacións e concellos, celebran múltiples actos en memoria dos 150 anos de Cantares Gallegos. Brión tamén se unirá a esta celebración cunha serie de iniciativas a cargo do  Dep. de Cultura e a biblioteca.

Fonte: Fundación Rosalía de Castro

Nova reunión do Club Camaleón

O mes está chegando a súa fin e o Camaleón que habita na biblioteca municipal está desexando reunirse cos seus amigos unha vez máis. Por iso que, este venres 22 de febreiro, os socios do Club Camaleón non podemos faltar a cita co seu amigo que muda de cor.

Como en anteriores ocasións, a diversión está asegurada con xogos e actividades variadas,  que de momento son sorpresa.  Lembra que hai dúas quendas de participación, unha de 17 a 18 e outra de 18 a 19 horas.

Para máis información, chama ao Tfno.: 981 50 99 69-981 50 99 08. Non faltes, o Camaleón esta esperando por ti!

jueves, 7 de febrero de 2013

Ciclo 'Vidal Bolaño recuperado: citas audiovisuais'

A Consellería de Cultura, Educación e Ordenación Universitaria organiza o ciclo 'Vidal Bolaño recuperado: citas audiovisuais', dentro da programación especial que o Centro Dramático Galego (CDG) dedica ao autor homenaxeado este ano co Día das Letras Galegas.

O Centro Dramático Galego celebrará todos os mércores e xoves de febreiro e novembro, no Salón Teatro, o ciclo 'Vidal Bolaño recuperado: citas audiovisuais' coa obra de Roberto Vidal Bolaño. O ciclo consta dun total de doce sesións nas que se proxectarán fragmentos da obra escénica deste autor, conducidas polo comentario dos profesores Inma López Silva e Xosé Manuel Fernández Castro.

No ciclo ofrecerase un amplo percorrido pola traxectoria teatral de Roberto Vidal Bolaño nas súas facetas de autor e director, afondando ao tempo na vixencia do seu legado e incidindo na transcendencia que para as artes escénicas galegas ten o feito de que, por primeira vez na súa historia, a Real Academia Galega decidira homenaxear no Día das Letras Galegas a un autor dramático que, asemade, consagrou a súa vida profesional ao oficio teatral.

Programación:

6 de febreiro 2013: "Agasallo de sombras"
7 de febreiro 2013: "Rosalía"
13 de febreiro 2013: "Laudamuco, señor de ningures"
14 de febreiro 2013: "Saxo tenor"
20 de febreiro 2013: "Anxeliños!"
21 de febreiro 2013: "Animaliños"
6 de novembro 2013: "As actas escuras"
7 de novembro 2013: "Xelmírez ou a gloria de Compostela"
13 de novembro 2013: "A burla do galo"
14 de novembro 2013: "Mar revolto"
20 de novembro 2013: "Rastros"
21 de novembro 2013: "Caprice des dieux"

Fonte: Santiagoturismo.com :: Axenda cultural